Литовський статут 1566 р. (Витяг)

   Жикгимонт Август б. м. король польский, великий князь Литовский, Руский, Пруский, Жомоитский, Мазовецкий, Ифлянтский и иных. Чиним явно ьсим вобец и каждому зособна нинешним и на потом будучим, иж тот статут великому князству Литовскому, панству нашому и всим землям к нему прислухаючим, упривильеваный в Вельску через нас господаря на сойме звыклом великом валном, который з стародавних часов, звыклый бывати в том панстве нашом великом князстве Литовском, зложоный и справленый и постановеный через обранье певное парсуны з роду и народу шляхецкого станов сеймом належачим родичом и обывателем того великого князства, леч иж ку уживаныо не пришел аж и до сих часов не выдан. Тогды то с тых прычин сталосе, иж через нас и през панов рад наших также и всих тых станов великого князства Литовского сойму належачіх не был еще проглядай и ревидован про войну уставичную, которую есьмо вели про вен тые часы з Московским, а так на теперешнем валном сойме Виленьском важными справами затруднены. Ведже яко в час мел знести, видечи быть потребную справедливость всим про то с паны рады нашими и зо всими станы сойму належачыми на поправованье и прегляданье того статуту заседшы и скорикговавшы вже на тот час на вей потомные часы ку ужыванью, вод-луг привильев господарских Вельского и Виленского в тот статут вышей вложоных и описаных, приложившы к ним третий прывилей, в тот же статут казавшы вписати на поровнованье и объявенье всих станов, иж ровно ку достоенствам так Литовский яко и Руский народ приходити маеть, выдали есмо и выдаем, при бытности и з уфалою и позволеньем рад наших и всих станов сойму належачых, всим в посполитость, водле которого вжо вей обыватели того панства нашого великого князства Литовского и вей земли ку нему належачие будуть се радити и судити, поправуючы и прибавляючы водле часу потребы артыкулов в том статуте на соймех валных великого князства Литовского, так яко около того поправованья артыкулов шырей доложоно и в привильи Вельском. А выдан есть сесь статут на сойме Виленском великом валном, року божьего нароженья тысеча пять сот шестдесят шостого месяца Марта, первого дня.

Роздєл первый.
О персоне господарской

   Арт. 1. Вен обыватели великого князства Литовского одним правом писаным и от нас даним сужены быть мають. Наперед мы, господар, обецуем и шлюбуєм под тою ж прысегою, которую учынили есьмо всим обывателем всих земль того панства нашего великого князства Литовского, иж всих княжат, панов рад духовных и свецких, панов хоруговных, шляхту, места и всих подданых наших и всих станов и в том панстве нашом великом князстве Литовском, также и земль Русских Киевское, Жомоитское, Волынское, Подляшское и иных земель, прислухаючых к тому панству нашему, почоншы от высшего стану аж и до нижнего, тыми одными правы писаными от нас даными судити исправовати.
   Арт. 2. Мы господа? обецуем и шлюбуєм никого не карата на заочное поведанье, хотя бы се дотыкало и о ображенье маєстату нашого господарского; и хто теж што на кого вел, а не довел, тым сам масть каран бытн. Теж предъречоным прелатом княжатом, п[а]нятом, паном, радам духовным и свецким, паном хоруговным шляхтам и местам земли великого князства Литовского, Руское, Киевское, Жомоитское, Волынское, Подляшское, Смоленьское, Полоцкое, Витебское, Мстиславское и иных земль великого князства Литовского, обецуем словом нашим господарчим, иж над жадного человека выданье албо осоченье явное таемное и подозренье тых станов вышеймененных карати не хочем ани винити которою кольвек виною пенежною, кривавою, везеньем, або достоенств врядов або именья отнятьем; нижли аж бы первей у суду явным рядом и поступом права, коли жалобник то есть повод и отпор обжалованый очивисте станут, и достаточне на конец будут поконаны, которые по суде и таковом поконанью винни, мають быти караны виною у артыкулех нижей описаных меновите незначоною. А хто бы теж кого колвек обмовляючи вчинил к соромоте и зелжывости, а шло бы о честь або о горло або о которое кольвек скаранье; тогды тот, на кого мовит и ведет, а не доведет, тым караньем сам маеть быти каран.
   Арт. 3. Ображенье маєстату господарчого. О ображенье маєстату господарчого так се разумеет, колибы хто змову албо спикненье албо бунт учинил на здоровье наше господарское, хотя бы пан бог уховал, иж бы оная змова не была учынком пополнена; таковый за слушным доводом, як о том нижой описано, честь и горло и именье стратит. Теж кгды маєстат наш ображон бывает с тое причины, кгды бы хто бунтовал покой посполитый врушаючы против нас господара ку шкоде и речы поспо-литое; и мынцу без воли нашое бил явне; а чого боже уховай на нас смерти, так теж и на потомки наши великие князи Литовские, по зешстях их хотечы хто осести и опановати тое панство великое князство и господарем быти на нем, войско люд служебный сбирал и выводил; то бы теж з неприятелми порозуменье мел, листи до них або послы против нам господарю и речы посполитое або остерегаючы слал, тым неприятелем якуюж кольвек помог давал, хотя бы теж замок наш непри-ятелеви подал; хто бы теж люди неприятельские панство наше великое князство Литовское зрадливе привел, а то бы на него слушне и справедливо было переведено... таковый с права з розсудку нашего с паны радами нашими великого князства Литовского честь горло тратить, и такового зрадцы дети сынове за таковый выступок отца своего безецны-ми будут, а именья того зрадцы отчызные выслужоные которым кольвек обычаем набытые мимо дети и близкие на нас господаря приходять. Ведьжо жоны таковых здрайц которые не будут ли ведали тое здрады мужов своих, а с того се выведут пресегами своими, таковые именей своих отчызных и матерыстых и вена пред учынком тое зрады им от мужей их описаного не тратят, але до именей отчызных не прийдут, хиба по смерти маток своих только до четвертое части именей матеры-стых приходити будуть.
   Арт. 6. Хтобы колвек с панства нашего до земли неприятельское утек. Теж уставуем, хтобы кольвек с подданных наших с панства нашего утек до земли неприятельское умыслом злым на зраду ку шкоде нам господарю и речы посполитой, такий честь тратит; а если бы пойман был, тогды и горлом маеть быти каран. А дети ач колвек для того выступку отца своего почтивости свое не тратят, але именья вей отцовские тратят, ниж бы што мели власного набытья своего, або перед тым учынком отца своего отделены были, тогды при том застати мають. Таким же обычаем и жоны если будуть не ведали таковое здрады мужов своих, таковые в том будуть захованы, яко в третем артыкуле сего розделу о таких есть описано.
   Арт. 10. Хто бы кому именье заставил а продал первой, нижли з земли утек. Тежд если бы которий человек перед тым нижли утечеть до земли неприятельское, будучи еще в панстве нашом, продал або запродал именье якое або люди або землю кому, а будет ли он тое рады его не ведал, и на то право поднесеть и окажет на то листы и держанья своего доведет; тогда маеть он тое купленеє або закупленное именье спокойно держать, а пак ли бы не хотел присегати, тогды тое купленеє або закупленное именье тратит.
   Арт. 11. Если бы отец от детей втек до земли неприятельское, так теж который ближшый. Теж уставуем, если бы отец от детей утек до земли неприятеля нашего Московского и до инших земель неприятель наших, а дети бы на именьи зоставил по себе; тогды именья его на нас господаря спадывають, бо за выступ отца их власного вже суть отдалены от имений. Ведьже которий бы сын был делный от отца своего и первей тое части своее в держанью был, нижли утек отец его, и мешкал бы на том кром отца своего не у в одном местцу з ним, а не за одним плотом, а тое рады и учынку отца своего не ведал, а не был подойзреный и вывелся того присегою своею; таковы тогды сыны и дочки от почтивости своее от части именья своего не одпадывают. А если бы которий прирожоный брат або девка або который будь з роду утек до земли того неприятеля нашего Московского и до земль неприятельских поганских; тогды делница, то есть часть невыделена не будеть выделена была, будь не выделена, спалывает на нас господаря, и ближний жаден не будет ку тому и не маеть мети ничего; а ведьже то братьи и близким яко в почтивости так и частем именьям их шкодити не маеть. А хтобы такового здрайцу утекаючого забил, або живого до нас и до вряду нашего привел, и то на его слушным доводом перевел; такового почтивости то шкодити не маеть, але еще за то будет годен ласки нашего госпо-дарское, а если бы не довел, тогды сам маеть быти каран, яко вышей описано.
   Арт. 12. Хто бы листы або печати наши фалшовал, чым маеть быти каран. Коли бы хто листы або печати наши фалыновал, або на кшталт руки нашое также с канцлярейных писаров наших того панства подписовал, абы хтобы теж печати наши соберыв и в собе ховал и их ужывал; таковый за сказаньем слушным явностью певною и доводом слушным ничим, иным толко огнем каран быти маеть...
   Арт. 13. О фалшованью монеты о мындзех и о золотарех. Теж хтобы монету нашу фалшовал и без воли нашое переправовал и обрезовал, так теж мындзаре наши, которие золото и серебро и иншую реч матерей належачую и прислухаючую мындзе фалшовали бы зливали и мешали ку пожитку своему а ку шкоде речи посполитое, а то бы на них досведчано; тые мають огнем караны без милосердья. Потомуж золотари, которие золото, серебро фалшують и межы того мешають медь, цын або олово, и в том бы были дознали; тогды сами мають огнем быти караны, а их маетность тому, кому шкоду учинили, маеть быти плачено. Ведьже работа тая и матерея, без которое бы тое ремесло их справова-но быти не могло подле звыклости ее, то фалшем розумено быти не маеть.
   Арт. 14. Не маеть никто ни за чий кольвек учинок терпети толко каждый сам за себе. Теж уставуем, иж нихто ни за чий кольвек учинок не маеть каран и сказан быти, толко которим винен, кгдыж того право божое и справедливость хрестиянская учыть, якож так хочем мети: абы ани отец за сына ани сын за отца, кром ображенья маєстату нашего, яко вышей около того ест описано, ани жона за мужа, ани муж за жону, так теж брат за брата, и жадный прирожоный, и слуга за пана, пан за слугу, нихто ни за чий выступ учынок, толко каждый сам за свой выступ маеть терпети и каран быти.
   Арт. 15. Хтобы много за мало упросил а без данины побрал. Теж хто много за мало упросил, а то бы на него устне и с права было переведено, вышшей нижли просил, таковый тую выслугу свою от нас даную тратит. А хотя бы и добре упросил, а без данины нашое што и к той выслуге своей взял, и к тому привернул; предъся тую выслугу и забранье тратит и спадывает то за се на нас господаря. А хто ку отчызному своему именью взял человека, або и десети, або колко кольвек и с землями, або земли пустое; тогды маеть каждого человека, колко будет взял, своими отзычнами навезати з земли, або кождую землю землею, а ведже не на голую повесть и обмову, але за огледаньем и выведаньем слушным и справедливым правным поступком и доводом через людей цнотливых и веры годных комисаров тубулцов. Ровностью права однакими доводами вдаючы се в ровное право и з шляхтою, яко о том нижей написано.
   Арт. 25. О мытех новых. Теж уставуем и приказуєм, абы жаден человек в том панстве нашом великом князстве Литовском не смел новых мыт вымышляти ани встановляти ни на дорогах, ни на местах, ани на греблях, ани на реках, ани в торгах, ани в местечках ни в стодолах, або в корчмах на гостинцах в именьях своих, кроме которые бы были з стародавна установлены, або мели бы на то листы предков наших або наши. А хто бы кольвек смел мыто кром звычайного торгового установляти; тогды тое именье, в котором мыто кром торгового установил, тратить и спадывает на нас господаря.
   Арт. 26. О неданье мыта шляхте. Теж з ласки и доброти нашое гос-подарское князем, паном радам духовным и свецским, шляхте в том панстве нашом тую вольность на водах на дорогах, то есть сухим путем и водным, на торгох, на мостех, так и именьях наших спущати и продавати з их власных гумен кождому его роботы правдивое збожье а не купленое, от того мыто не маеть быти давано; так теж и от подвод шляхецских, которие з их речми властным збожьем а стацыями ходять, от того всего мыто и мостовое брано быть не маеть. А если бы што купленого збожья и иншых речей пры том мел; от того мыто маеть платити. А ведже сами особами своими, або где бы их самих при том не было, тогды слуги их або справцы от них притом посланые веры годные на мытех наших головных мають присегнути, што ест правдивое роботы его домовое а што теж прикупленеє, а подводы мають без присеги быти пропущены толко за листы и печатми их, тым же обычаем и лесные товары и от всякого господарства домовое работы маеть ся разумети и безмытне пропущены быти. А на мостех старожитных, где перед тым што будеть давано только от подвод таких, которие збожье на продажу везуть, ведже водле стародавнего обычаю мають давати.

Роздєл третий.
О вольностях шляхецких и о розмноженью великого князства Литовского

   Арт. 1. О розмноженью великого князства Литовского. Мы господар обецуем теж и шлюбуєм за себе и за потомки наши великие князи Литовские под тоюж присегою нашою, которую есьмо учинили всим обывателем всих земль великого князства Литовского и всих земль ку нему здавна и тепер належачых у славе, титуле, столицы, зацность, и владзы, и можность роска зованью, и в иншых всих належностях и прислухиваныо и в границах ни в чом не вменшати и о вшем примножати. И хотя бы пан бог з ласки свое светое нам господару узычити рачыл панства Литовского князей и панов рад духовных и свецских и всих врядников земских и дворных шляхту рыцерства и всих иных станов ни в чом того не понижати, але от всякое легкости и пониженья, яко славное памяти продки наши, великие князи Литовские, за щастливого панованья своего чынити стеречы и боронити будем, с помочъю божьего стараючисе о примноженье и вывышенья того панства и всих станов достойности оздоб и пожытков з наиболшого пилностыо и всилованьем нашим.
   Арт. 2. О вольностях шляхецских. Теж мы господар обецуем словом нашим за нас и за потомки наши великие князи Литовские под таким же обовязком нашим, яко вышей у первом артыкуле ест описано, иж всих князей и панов рад, як духовных, так и свецских, и всех врядников земских и дворных, панов хоруговных, шляхту, рыцарство, мещане и всих людей посполитых у великом князстве Литовском и во всих землях того панства нам заховати при свободах и вольностях хре-стиянских, в которых они, яко люде вольные, вольно обираючы из стародавна из вечных своих продков себе панов и Господарей великих князей Литовских, жыли и справовали прикладом и способом волных панств хрестиянских, ровнаючы однако маючы и тых вольностей ужи-ваючы и суседы братьею своею рыцерством и иные станы народу ко-руны Польское, и особливе на то при свободах и вольностях на привильях и листех великих князей Литовских, продков наших, и от нас всем вобец яко и кождому зособна на учтивости достоенства вряды на именья, на люде, на кгрунты и на што кольвек даных, и што еще будуть даваны вперед, напорушне неотменне (вечными часы ховати). А хто-бы теж што хотя без привильев за отчызным правом яким кольвек обычаем набытых людей кгрунтов своих в держанью был, так за славного панованья продков наших короля его милости Казимера и Александра, яко теж за светое памяти Я отца нашего щастливого панованья, тые сами с потомки их близкими своими и тепер то вечне держати мають и будуть.
   Арт. 3. Мы господар обецуем розмножити великое князство Литовское, а штабы разобрано и одышло зась ку нему привернути. Теж добра княз-ства Литовского не уменшым и то, што будеть через неприятелей того панства нашего отдалено; розобрано и ку иншому панству от того панства нашего коли кольвек упрошоно, ку короне ку Мазовшу ку Прусом ку Ифлянтом, то за се ку власности того великого князства привести привлащати и границы оправити обецуем. А хотя бых теж кому за-граничником при границах тых верху мененых земли, именья, села и люди дали; тогда таковые мають с того служыти великому князству Литовскому, а хтобы не хотел служыти, таковых привильев не маем мы и потомки наши держати.
   Арт. 4. О неданье шляхты и их имений кгрунтов и всяких вольностей и теж подате листов и привильев против сему статуту.
   Уставуем и вечными часы ховати и держати обецуем, иж як о прод-ки наши великие князи Литовские, так и мы незвыклые никому ни которым способом бояр шляхецских имений кгрунтов и земель давати, так и тепер на все потомные часы обецуем и прирекаем под тою ж присегою нашою, которую есьмо учинили обывателем сего панства нашего великого князства Литовского, бояр шляхты и их имений кгрунтов и всякое маетности и иных свобод и вольностей и прав в них отбирати и отводити, и ни яким особам, которым кольвек в том панстве обывателем яко и заграничником и посторонним и жадному иному, давати записовати и ни которым способом отдаляти не маем...
   Арт. 5. О соймиках поветовых и о выправованью и посланью в них послов земских на вольный сойм. Уставуем для лепшого порадку во всех речах и в способу ку справедливости и обороне, абы за волею всех на соймиках потребы се земские становили и отправованы были, або вечными часы перед сеймом великим вальным, которым маем мы и потомки наши завжды, коли того потреба окажеть речы посполитое великого князства, порядою рад наших тогож панства складати листы нашими соймики поветовые, а меновите на тых местцах и воеводствах нижей суть написаных и постановленых, которые соймики также листы нашыми даны будуть не на близшей час и рок, толко за чотыры недели перед соймом великим. На которые соймики мають зъежджатися и бывати тые воеводове и каштелянове врядники земские, потомуж князове панове шляхта того ж повету и воеводства, а намовляти о тых речах и потребах земских, которые им на местцах наших ознаймены будуть, на мней теж о своих и о всех потребах земских и долеглостях оного повету и воеводства; и зволившыся вей одностайным зданьем мають обирати послов своих; то ест от кождого суду земского, колко их у том воеводстве будеть, по две особы, послати их на сойм ознаймившы и вручившы то все им, о чом водле листов наших господарских, и теж во всех потребах, радити намовляти и становити мають, даючы им моц на том таковом вальном сойме поступовати и кончыти тые и иные при-палые речи водле часу и потребы. Ведже князей, панов, маршалков и иных всих урядников земских и дворных подле старого обычаю маем листы нашими на таковый вальный сойм взывати; и тые вей в раде по-сполитой местца и воты свои будуть мети способом звычаю стародавнего, а пословы земские местца и воты свое мають мети водле порадку нижей написаного.
   Арт. 6. О сойму вольном. При том теж уставуем, с призволеньем рад наших духовных и свецких и зо всими стану сойму належачими, на теперешнем сойму великом Виленьском, хочеты то все мети вечными часы, иж маем мы и потомки наши великие князи Литовские с потребы речы посполитое за радою рад наших того ж панства, або за прозбого рыцерства, складати сеймы вальные в том же панстве великом князстве Литовском завжды, коли колко того будеть потреба.
   Арт. 8. Або панове шляхту о почтивость их сами не судили. Теж уставуем, иж княжата и панове рада наша шляхту и каждого бы з рыцерства нашего, которые теж шляхту нашу служебниками в себе ховают, не мають сами о почтивость судити кроме нас; бо тот суд никому иному не належит одно господару. А што се дотычеть злодейства, забийства и иншых речей выступков - то волни будуть панове их з ними, осадив-шы при собе пред се шляхту людей добрых, справедливость чынити, а в чом бы был хто с права поконан, тогды тот за выступок своей терпети и каран быти бы и горлом.
   Арт. 9. Их достоенств врядов в дедицтво чужоземцем давано быти не маеть. Так теж мы господар обецуем и шюбуєм под присегою нашою, которую учынили есьмо великому князству Литовскому и всим станом и обывателям его, беручы то из статуту старого пана отца нашего короля е.м. тому панству великому князству Литовскому даного, а в сесь выкладаючы и на то позволяючы, штож в том панстве великом князстве Литовском и во всих землях ему прислухаючих достойностей духовных и свецких городов дворов и кгрунтов староств вдержаньи и пожываньи и вечностей жадных чужоземцем и заграничником ани суседом таго панства давати не маем; але то все мы и потомки наши великие князи Литовские давати будуть повинни только Литве а Руси, родичом старожитым и врожонцам великого князства Литовского и иных земль тому великому князству належачих...
   Арт. 10. Достойности и вряды давние не мают быти нарушены. Теж обецуем и хочем вечными часы мети, абы панове рада наша, так духовные яко свецкие, и вей иные врядники наши земские и дворные, в том панстве нашом великом князстве Литовском были во всяких достоенствах и у почтивостях захованы водле давного обычаю и кождый подле зацности и местца своего. А што се дотычеть владности и справ их судовых: в том се они мають заховати и справовати, яко нижей в сем статуте ест описано.
   Арт. 11. Достоенств и врядов на заочное обмовенье не маем одыймовати. Теж обецуем, иж достойностей всяких врядов староств держав тивунств на справу чию кольвек и на обмовы заочные мы и потомки наши не мають отнимати; але коли бы который из врадников наших был роспрошытель або шкодник наш и дворов наших, и до нас бы в том обмовен и обвинен был; тогды обоя сторона, як тая хто ведет, так на кого менит, мають перед нами очевисто стати, а мы с паны радами нашими великого князства Литовского, выслухавшы их и розознавшы тую реч, винного водле выступку его карати маем, а безвинне й без права на заочное поведанье не будем ни в кого врядов брати ани их з них рушати.
   Арт. 12. О держанью старых устав, а новых без сейму вального не встановляти. Теж прирекаем вен привелея земские стародавные и ново от нас наданые волности и звычай добрый стародавній тым статутом нашим ховати и ни в чом ни нарушати, а нового ничего не встановляти. А ведь же была ль бы того потреба што нового прибавити ку доброму речы посполитой; тогды того не маем чынити ани встав жадных делати, аж на вальном сойме того панства нашого и в здешнем панстве нашом великом князстве Литовском, а ведомостью порадою рад наших и призволеньем всих земль того панства нашего.
   Арт. 13. О волности выеханья нашого из земли кром земль неприятельских. Теж узычаем и уфаляем вечными часы, абы княжата и панове хоруговные шляхты и кождый человек рыцерский и всякого стану того панства нашего великого князства Литовского мели вольность и моц выехати и выйти с тых земль наших великого князства Литовского для наук у письме цвиченя учынков рыцерских и лепшаго счастья своего, и теж будучы неспособного здоровья своего для лекарств до всяких сторон и земль, кроме земль неприятелей наших Московского бусурманских и иных, с ким тое панство наше на он час вальчыло; а ведьже так, абы из именей их под тым часом в небытности их самих службы земское не были омешканы, але нам и потомкам нашим яко при них были завжды, только иле кроть бы потребы вказовали подле уфалы и уставы земское были заслугованы. А если бы сын поехал по рыцерству, а отца собе зоставил, а в небытности его отец бы вмер, а не оставил бы по собе другого сына дорослого або опекуна або близкого кревнаго прирожоного в именях; тогды мы господар маем опекуна установити на тые именья, хто бы з них службу земскую заступовал и именья от кривды и шкод боронил, а кгды тот с чужих земль приедет, мает именья, и маетность свою до рук взяти яко властность свою.
   Арт. 14. По смерти отцов и маток и иных кровных и близких их детей и потомков от каждого дедицства спадком выслуги и всякого набытья не отдаляти. Теж уставуем, иж по смерти отцов и маток их дети сынове и дочки отчизны и материзны не мають быти отдалены, але они сами и щадки их властные кровные и близкие правом прирожоным и слушне набытым звычаем стародавным и теж статутом першым и теперешним мають посягнути и одержати, и тые добра на пожыток свой оборочати вечными часы. А то се теж будет розумети о близкостях спадкох выслугах и всяком набытыо водлуг права тым же обычаем, естли бы было колко братьи и сестер рожоных выданых албо и не выданых замуж, а тые бы братья межы собою отчызною поделилися, албо еще не поделили, а который бы з них потом умер не зоставивши по себе плоду; тогды его часть отчызны толко на братью приходит и на их потомство, а на сестри толко выправа с четвертое части всякого именья, естли бы перед тым которая з них замуж идучы от отца своего або теж от тое ж братьи не была дана, поколь бы се были межы собою не поделили; а если бы была матерызна, тогды мають братья з сестрами ровно поделити межы собою...
   Арт. 15. Людей простых над шляхту не повышати. Теж простых людей над шляхту не повышати, на достойности их прекладати и врядов наших простым людем давати не маем, а шляхте кождому рыцерскому человеку тутошнего панства нашого великого князства Литовского родичу мы господар, з ласки нашое господарское за службами за годностями их нам господару, обецуем их водле годностей достойностями и вряды опатровати и в службах наших заховати, яко верных наших подданых.
   Арт. 24. О вызволенье от платов новых и подвод хромей стародавнего обычаю, як теж по дорогам. Теж у ставу ем и хочем мети, абы вей посполитые люди тяглые и вей поданые княжат панов хоруговных, шляхт, бояр и мещан тых земль великого князства Литовского от кождое дани плаченья и податку серебщизного, и теж дела и ото всяких беремен каменья дерева або дров ку паденью плиты и вапна на замки наши, кром стародавнаго обычаю, так и подводы хтобы перед тым давал и подыймованье стацыи на станех и на местцах звычайных нам господарю послом гонцем нашим, так теж и мосты поправовати и новые на старих звычайных местцах будовати замки старке поправовати, так и на тых старих местцах деленицы свое знову будовати и послов подыймовати, то водлуг стародавного обычаю в целости заховуєм. А княжата панове рады воеводе старостове украинные и нихто з шляхты, ездечи по дорогам от именья до именья своего и в войско на замки украинные едучи, именей шляхецских и их подданных це мають шкодити, стации и подвод брати, але собе и слугам и конем своим за пенези водлуг торгу ценою куповати будуть повинни; а хтобы над сюю уставу нашу што учинил, тот стороне жалобливой кгвалту дванадцать рублей грошей платити маеть, а шкоду совито оправити за слушным доводом.
   Арт. 27. О мещанех места нашого Виленского, яким правом шляхту з мещаны судити мають. Теж уставуем, иж кгды бы се трафило жаловати которому шляхтичу на подданных наших мещан Виленьских о раны о головщизны; тогды о то судить вряд меский маеть своим судом, Майдеборским правом, водлуг привильев и наданья им от нас господаря и от предков наших. Где бы се теж трафило який кгвалт мещанину от шляхтича, хотя бы в том месте нашом Виленьском; тогды таковые речы вряд замковый земский справедливость чинить будуть правом земским и статутом прав посполитых сего панства великого князства Литовского, и карати ведлуг права и статуту земского. А мещане иных мест шляхту судити мають о раны о головщизны их шляхецкие земским правом, водлуг стародавнего статуту короля е. м. Жикгимонта пана отца нашего.
   Арт. 29. О слуги и о люди шляхецские челядь неволную, которые до мест входить. - Уставуем, которие бы слуги и люде отчизные або челядь невольная втекли от княжат, панов або от которого шляхтича, и пришли до столечного места нашего Виленского, або до иных мест наших князских, панских и духовных, в землях панства нашего великого князства Литовского; иж тых людей слуг мають войтове, бурмистрове, радцы наши з мест наших выслухавшы слушного доводу от панов их судечи земским правом, кромей которое бы слуги шляхецские пришедши до мест наших, а принемши право в котором з мест наших войтове и врядники наши выдати не мають. А што се дотысечь челяди неволное, которые бы пришли до мест наших; тым ани права Майдеборского принятье ани оселость ани теж заселене десети лет ку помочы быти не маеть, и повинны будуть войтове и державцы и врядники наши им выдати. Так теж старостам и державцам и врядником нашим, где права Майдеборского нет, на врядех наших тым же обычаем противко таковым збегом заховатися мають...
   Арт. 32. Отец за живота своего змушенья не повинен именья детем поступовати, леч по доброй воли части его. Уставуем теж, иж отец детем за жывота своего змушенья не повинен именья жадного поступовати, нижли по доброй воли своей, што воля его будеть. Также невеста, которая будеть именья свои отчызные або материстые мети, змушенья не повинна за живота своего детем поступовати, але што будеть добрая воля ее, то может поступити. А што се дотычеть материстых именей, не будуть ли мети на то слушного права и описов, повинен то сыну дорослому и девце замуж ее выдавши поступити; а сын и дочка на отцу жадных шкод и личбы с тых имений поискивати не мають.
   Арт. 34. О вольности шафовати выслугою своею. Теж хто кому дати хотел даровати записывати або продати именье выслугу свою на нас господарю; тот не можеть того никому перед жадным урядом записати; только пришедшы и постановивши се перед нами господарем и з ведомом нашим, а мы того боронити не будем. Ведже которые бы мели привилья наши, а в них то доложено, иж волно ему отдати, даровати и записати; таковые могут оное именье записовати перед кождым врядом, яко отчызну свою або куплю. А звлаща тые которые бы собе и потомком своим на вечность описаную мели, а тые привилья мають на врядех оказываны быти; а которые бы ленным правом або дожывотьем або до воли и ласки нашое господарское имели, тых маем заховати водле привильев их и ласки нашое господарское.
   Арт. 37. Хто бы именье от нас дате в кого отыймовал. Теж уставуем, кому быхмо мы господар именье або люди и земли дали, а хто иншый по той данине нашой тое именье отнял; тогды тот, у кого отнято, может того доходити и правом поискивати, нижли большей искати не можеть одно, яко ему дано и як на нас господаря то держано, толко бы давности земское от того часу, яко ему дали, не омешкал.
   Арт. 39. Мы господар шлюбуеем однакую справедливость всим чинить, а [пересуду] мы и панове рады нашим брати не маем. Обецуем теж з ласки и добрости и милости нашой господарской ку подданным нашим, всему рицерству великого князства Литовского, под сумненьем нашим, иж мы господар и панове рада наши маем кождому стану всим заров-но однакую справедливость чинить без отволоки, а от права не маем ничего брати; потомуж и панове рада наша, а не маем теж стати и зычностью быти одной стороне, але просто кождому справедливость делати будем повинни, так теж и панове рада наши под присегого, которую до рады вчинили, справедливость чинити будуть повинни. А што се дотычеть почтивостей шляхецских, а то жаден с панов рад ани суд замковый ани теж суд земский поветовый не маеть судити, толко мы сами господар с порадою панов рад наших великого князства Литовского судити маем обычаем вышейписаным. Ведже што здавна и теперь в сем статуте суду замковому належыть, то суд замковый судити и отправовати маеть.

Роздєл семый.
О записех и продажах

   Арт. 3. Хто бы хотел именье свое отчизное продати або зоставити. Хочем теж мети и уставуем, абы кождый таковый, хто бы хотел именье свое отчизное продати або заставити; тогды маеть прийти перед нас господара або перед вряд земский, в котором повете тое именье лежит, объявити перед судом земским, которая продажа за таковым обычаем будеть моцна и вечна держана, хотя бы на то и потверженья нашего господарского не было. А ведьже тот, кому будеть записано, того ж часу маеть, взявши возного з уряду поветового, увойти в держанье и того именья; пакли бы по оном записе в держанье того именья не пришел, а давность земскую десеть лет промолчал, тогды таковая продажа и застава потом моцы ни которое мети не будеть.
   Арт. 4. О вольности продати третюю часть на вечность. Уставуем, хто бы хотел именье свое отчизное продати на вечность; тогды только третюю часть именья отчизного вольно ему на вечность продати, а две части того ж именья в суме зоставити. А ведьже не маеть большей на тые две части именья отчизного брати, только так, якобы сума не превышала на уфалу и постановене наше...; а где бы болын на тые две части пенезей дано, тогды дети яко близкие не будуть повинни болын платити, только шацунком потому яко вышей описано, а што будеть пре-вышати, хто вышей дал, маеть згинути.

Роздєл одинадцатий.
О кгвалтэх и о головщызнах шляхєцких

   Арт. 1. Хто бы на чий дом або на господу умысльне наехал, хотечи его забити. Хто бы на чий дом а господу умыслне наехал, хотечи его забити, а умыслне наехавши або нашедши, а в том дому кого кольвек ранил або забил, а ото бы на него переведено было слушным доводом; таковый горло тратит, а головщизна близким з именья плачена быти маеть. А естьли бы кгвалтом наехал або на дом нашол, а никого не ранил а ни забил, а знаки предсе кгвалту або шкоду якую учинил; тогды только за кгвалт будеть повинен платити дванадцать рублей грошей и шкоду оправити за слушным доводом, а горла для нахожденья кгвалту не тратит. Тым же теж обычаем естьли хто кому в месте на господу нашол кгвалтовне, а кого забил або ранил и тым покой посполитый взрушил, маеть быти сужон и сказан на горло.
   Арт. 2. О довод кгвалту, як мають осведчати и обжаловать Уставуем, кгды бы хто на кого наехал кгвалтом и забил, а ведь же на такового кгвал-товника такий довод маеть быти: естьли бы на чый дом або на господу чью наехал и забил кого; тогды скоро по оном кгвалте того ж часу кгвалт и того забитого маеть оповедати и оказати околичным суседом своим, а в небытности их ино врядникам их шляхте людем добрым, а в недостатку шляхты ино также околичным суседом своим, хотя и не шляхте только людем добрым веры маеть оказати, а потом обжаловати вряду замковому або двору нашему, которий близший будеть, и возного взяти и так же оказати кгвалт и забитого, и тот кгвалт и жалобу в книги записати. И в праве естлибы се ку оному кгвалту и забитому не знал; тогды вжо тот жалобник близший будеть того суседи околичными и возным або выписом врядовым на него доводити, и при том доводе самотреть и з шляхтичами собе ровными присегнути, а естли бы на тот час не могли мети шляхтичов ку доводу, тогды и з жоною своею и с детьми дорослыми, а не будеть ли мети детей дорослых, ино и з жоною и з слугами домовыми маеть того кгвалтовника поприсегнути, а кгды присягнеть, тогды тот горло тратить, а головщина его близким того забитого маеть быти плачена, а шкоду за слушным доводом. А естли бы кгвалтом на дом наехал и не забил, только ранил; тогды также маеть тот кгвалт оповедати и раны оказати околичными суседьми, яко вышей описано, и при таковом доводе кгвалтовника кгвалту и ранного маеть сам семь з людьми добрыми шляхтою присегнути, а кгды при-сягнеть, таковый кгвалтовник маеть быти горлом каран, нижли естьли бы сполна шести сведков не мел, тогды и с трема сведками самочварт присегнути маеть, а кгвалтовник за таковым незуполным доводом горла не тратит, одно кгвалту дванадцать рублей грошей; а навезку водле стану и шкоду за доводом маеть платити, а за вину дванадцать недель в везенью сидети. Пакли бы на том доводе своем устал, тогды только сам ранный на ранах своих присегнути маеть, которому по присязе его на-везка будеть сказана, а кгвалт и шкоды не мають быти сказаны. А где бы на оном кгвалте в дому никого не забито ани ранено, только одно шкода учинена; таковый кгвалт также маеть быти осведчон, яко вышей описано, а при том доводе у праве на кгвалтовника маеть тым же обычаем на кгвалте и на шкодах самотрет присегнути, а кгды присягнеть, маеть быти кгвалт плачон дванадцать рублев грошей, и шкоды оправити за доводом его, а горла не тратит, а не будеть ли мети чим платити, а именье его тое бы шкоды и маетность не стояла, тогды у в остатку запрлаты сам маеть быти выдан. А где бы тот, на чий дом наехал, чинил собе быти ровную шкоду о сорок або о петдесят кон грошей; то и з жоною и з детьми лет дорослыми на той шкоде присегнути маеть. А жоне детем забитого, а в недостатку их, оно кровным таким же обычаем маеть право йти, яко вышей описано.
   Арт. 13. О звадах шляхецских. Хто бы кому руку або ногу втял, або око, губу, зубы, ухо вытял, за кождый таковый члонок по петдесят коп грошей платити, а двадцать и чотыри недели на замку седети. Або хто бы обе две руки и обе две ноги и обе две ухи оттял и обе две очи; тогды головщизну яку за человека маеть плачено сто коп грошей, а год и шесть недель седети. А рана, которая бы у человека была, с которое бы кости выбирано, тридцать коп грошей. А естли бы с тое раны реч замкнул, хотя бы се и выгоил; тогды маеть сто коп грошей яко головщизны платить, роки шесть недель сидети. А естли бы рана была на твари, сорок коп грошей платити; а хотя бы поличок кому дал, бороду рвал, тогды за все тое по дванадцати рублев грошей платити; а хотя бы бил кием шляхтича, сорок коп грошей платити. А белым головам шляхецским як головщизна так и навезка маеть быти плачена совито, тым же обычаем потом и их жонам и детем, которие венчальные жоны мають, маеть быти навезка шляхецская.
   Арт. 15. О мещанине, который бы шляхтича ранил. Если бы который мещанин у бурмистровстве шляхтича забил або ранил; тогды маеть навезати так, яко вышей описано. Нижли естли бы бурмистром на тоть-час не был, кгды шляхтича ранил; маеть руку тратить. Также теж и хлоп простый, естли бы забил або ранил шляхтича, маеть руку тратить, а е стли руку або ногу шляхтичу утнет, або на котором члонку охромит, маеть горлом каран быти.
   Арт. 18. Который бы слуга забил або ранил пана своего. Теж уставуем, естли бы который слуга взял перед себе злый умысел, пана своего забил або ранил; таковый маеть срокго горлом каран быти здрайца, а естли бы не забил ани ранил, одно брони против пана своего добыл, таковый руку тратит.
   Арт. 31. О забытье человека перееждчого и безплеменнаго. Уставуем теж, естьли бы ся потрафило где ж кольвек забитого человека перехождчаго або безплеменнаго, которого головщизны искати не будет кому; тогды скоро такового человека труп будеть знайден, того ж часу вряд того замку або двора нашего врядник маеть обослати всих мещан людей сельских, так и подданых наших яко и шляхецских, и опыт вчинити раз або и два, а где бы се на таких двох копах о том забитью выведатися не могли, тогды третюю копу присяжную маеть вряд собрати, на которой повинни будуть вей тые, которые на той копе повинни се становити, присег-ути на том, иж сами не суть причиною того забитья и о таковом мужобойцы не ведают. А естьли бы которая с тых копников на присяжной копе нестали, або хотя и ставши, присегого отвестися не хотели; тогды таковые будуть повинни головщизну сами платити, а собе винного искати; а тая головщизна маеть зостати при том вряде, в котором тот труп налезен, а потом кгды бы кровные оного забитого выналезлися, маеть тая головщизна оным кровным отдана быти.

Роздєл дванадцатый.
О головщызнах и навєзках людєй посполитих

   Арт. 1. О головщизнах и навезках людей простого стану. Головщизна панцерному слузе пятдесят коп грошей, путному слузе тридцать коп грошей, бортнику двадцать пять коп грошей, тяглому двадцать коп грошей, паробку десять коп грошей, а жонам их совито. А навезка парн-церному слузе шесть рублей грошей, бортнику два рубли грошей, тяглому рубль грошей, паробку полтина грошей, а жонам их совито, а жонца, которая мужа не маеть и не мела, полтина грошей.
   Арт. 2. Головщизны и навезки тивунам, ключником, войтом, старцом, лавникам сельским. Тивуну, ключнику, войту, старцу головщизна сорок коп грошей, естьли бы невольник в котором с тых врядов был, тогды ему во вряде головщизны двадцать коп грошей, а навезки рубль грошей. А пакли бы в ключох або у войтовстве которий шляхтич был; таковому предсе головщизна маеть быти водле стану шляхецского. А навезка тивуну, ключнику, войту, старцу по три рубли грошей, а лавнику два рубли грошей.
   Арт. 7. Человек вольный за жаден выступок в неволю выдан быти не маеть. Теж уставуем, иж человек волный за жадный выступок в неволю вечную выдан быть не маеть, а естьли бы в суме великой выдан был; маеть с тое сумы выроблятися, и выпуску па каждый год мужику полтина, а жонце пол копы грошей. А естьлибы с тое сумы до смерти выслужитися не мог, а будеть ли мети дети; тогды дети не мають се с тое сумы выробляти. А выпуску дорослым детем потомуж маеть быти, якшо вышей описано. А закупным людем тым же обычаем из сумы пенежное выпуст быть маеть.
   Арт. 8. О человеку отчизнам. Кгды бы который человек отчизный, отшедши от пана своего и заложившися за кого иншого, не далеко в пети або в десяти милях мешкал; тогды вже о такового человека вечне молчать маеть. Пакли бы тот человек отчизный отшедшы от пана своего и мешкал далеко в колькодесяти милях, а пан его о нем не ведал, а потом бы засе пришел и перемешкивал поблизу; тогды хотябы в оном часе и давность земская зашла, вольно будеть ему того человека за от-чича правом доходити, только бы давности не омешкал от часу, як ближей прийдет.
   Арт. 10. О челядь невольную, которая втечеть от пана своего. Уставуем, кгды бы хто чию челядь невольную вывел, або ведаю и заказ в себе переховывал, а то бы на него правом было переведено; тогды таковый повинен будеть ту челедь отъискати, а о[т]ыскавши тому пану отдати. А где бы не мог о[т]ыскати, або не хотел; будеть повинен тую челядь сам ценою платити, яко выше написано, и шкоду оправити от того часу, от которого ему тая челядь не робила, мужику и жонце за каждую неделю по шести грошей.
   Арт. 11. О вольных людех, которые в голод продають. Хто бы в голод сам себе або сына або теж которого человека вольного в неволю продал, и лист на то дал; таковый лист не маеть быти держан, але яко голод минет, а он пенезей добудете, маеть ему пенези отдати. Нижли естли бы хто челядь свою неволную продал; тая ведле продажи маеть вечне держана быти.
   Арт. 13. Невольницы мають быти трояких причин. Теж уставуем, иж невольницы мають быти троякх причин: первые которые суть здавна в неволи, або с невольных се родят; другие которые полоном заведены суть из землои неприятельское; третие коли бы се сами в неволю поддали, а хто бы, ведаючы жонку неволную, в малженство понял, хотя человек вольный, тогды таковый сам и дети их в неволи быти мають. А естьли бы се неведоме поняли, а один з них будучи вольным не хотел в том быти; тогды того ж часу мають се втечи до права духовного, ведле которого их мають розвести, а по розводе таковый вольный маеть зос-тати вольным, а невольный неволным.

Роздел третийнадъцать.
О грабєжох и навезках

   Арт. 5. Яко челядь невольная втеклая маеть быта заповедана. Еслибы чия челядь невольная втекла, а заповедана бы з якого перейму, и женучи за нею в погоню в каого бы ее нашел; тогды маеть тому, в кого челядь зостанет, переем дати, с чого будеть первей заповедал. А естли бы заповеди и перейму, в кого оную челядь нашел, недал, а тот бы ему не хотел тое челяди без перейму выдати, и взял позем кгвалтом, а до права о то был позван; тогды тот за тым позвом повинен будеть стороне жалобливой платити, яко за кгвалт дванадцать рублев грошей. А естьли бы хто чию челядь в себе ховал, а тот по колко кроть заповеди и по торгу закликал, оповедаючи ее, и потом бы тот, чия челядь, в колко неделях тую челядь свою в него нашол; тогды только маеть, за страву ему от кождого челядника на неделю по два гроди давши, челядь свою добровольне взяти.
   Арт. 6. О грабеже человека князского, панского и земянского. Уставуем, естли бы шляхтич чиих людей пограбил на торгу при церкви на добровольной дорозе; таковый маеть стороне обжалованой вины заплатити шесть рублей грошей, а грабеж з навезкою отдати, то ест коня конем вола волом навезати. А пакли бы шляхтич або хтож кольвек пограбил у чиих людей на поли або где индей, а бою не вчинил; тогды маеть заплатити три рубли грошей, а грабеж также навезати. А мужик мужика естли бы при костеле або на торгу на дорозе пограбил; маеть заплатити три рубли грошей а грабеж всякий также з навезкою платити маеть, коня конем, вола волом, а корову коровою, и кождое быдло, якое пограбил, таковым навезавши маеть отдати, або ценою заплатити...

Роздел чотырнадцатой.
О злодействе всякого стану

   Арт. 4. О важности лица за што злодей каран быти маеть. Уставуем, иж каждый злодей з лицом приведений и правом покананый при лицы, которое бы стояло выше полтины грошей; маеть горлом каран быти. А што бы за полтину грошей не стояло; маеть у столпа дубцы бит быти, а лицо маеть вернути тому, чиє есть, а навезка на тое лицо з маетности его маеть быти плачена, а не будеть ли чим мети навезки платити, тогды ухо тому злодею маеть урезано быти. А которое бы лицо вышей полукопка або за полкопы стояло; при таковом лицу маеть быти также у столпа бит и з места высведчити. А которое лице будеть стояти за дванадцать грошей, за то также маеть бит быти; а потом того ж естли бы се трафило поймати з лицом, хотя бы тое лице и десети грошей не стояло, тогды вжо маеть быти каран яко злодей.
   Арт. 6. О гоненье следом в якой кольвек шкоде подкраденой. Кому бы покрадени кони, волы, быдло и иные речи в дому, а тот шкодный поднял бы след тое шкоды своее, и собравшы людей добрых околичных суседов водле давного обычаю гонил следом, а тот след где бы ку которому селу або в чий дом привел; тогды маеть послати до того села або до дому, где след вшол, людей добрих сторонних веры годных, абы 3 села своего и з дому, где бы след вшол, або з кгрунту земли села своего след вывели. Таковое село або в чий дом след будете вшол, мають тот след в тое копы взяти и з села або з дому и з земли, своее того села след вывести аж до иншое границы, куды тот след пойдеть. А естли бы тое село, до которого след приведен, от себе следу не вывели або от следу отбили або выгнавши быдлом затоптали; на таковом застановившисе копа тая, где следу не отведено або отбито, мають послати по возного до вряду нашего замкового, и с тым возным и люди сторони ые копа вся мають оную шкоду осумовати, на чом оный шкодный самотреть присегнет, и приложить до того села, абы они шкоду заплативши собе винного искали. А по сказанью мають через возного и сторону, которие при том были, объявити вряду и половину пересуда дати, а вряд маеть рок заплате зложити, и яко рок выйдеть; тогды вряд оного пана листом своим напоменути маеть, абы водле права оного суду корного заплату чинил, а не будеть ли хто хотети, тогды тая шкода з уряду отправена маеть быти.
   Арт. 29. О человека отчизною и человека хто его выкрал. Уставуем, естли бы хто вывел або выкрал чиего человека отчизного або челядника невольного, а погонен был на дорозе и пойман с тым человеком або с челядью; тогды маеть с тым лицем веден быти до вряду нашего, где на-ближей будеть, а вряд маеть ему справедливость учинити. А естли бы оный к тому се не знал, абы тую челядь выкрал; тогды оный, хто его с тою челядью поймаеть, маеть на него доводити або присегу учинити, иж он ее вывел, а он маеть быти каран яко злодей, а челядь оная маеть вернена быти, чия была. Пакли бы на дорозе поганити не мог, а в дому чием зостал и припоручил, а он бы тое челяди выдати не хотел; тогды маеть тот пан, у чиего человека где тую челедь зостал, с таковым справедливость учинити, и найдет ли се с права, тот иж ее выдати хотел; тогды от того часу колько через прируку держал, мають тую челядь навезати и навезавши ему челядь вернути, яко о том вышей описано.